Allt

Opnunartími yfir hátíðarnar

21/12/2017 • By

Eins og alltaf yfir jól og áramót riðlast opnunartími hjá Símanum eitthvað, bæði í verslunum okkar sem og í Þjónustuveri Símans.

Hér má sjá opnunartímann, ef annað er ekki tekið fram gildir almennur opnunartími.

Við óskum þér og þínum gleðilegra jóla og farsældar á nýju ári. Takk fyrir samskiptin á árinu sem er að líða.

Verslanir Símans

Ármúli Kringlan Smáralind Glerártorg
Þorláksmessa 11:00 – 16:00 10:00 – 23:00 11:00 – 23:00 10:00 – 23:00
Aðfangadagur Lokað 10:00 – 13:00 10:00 – 13:00 10:00 – 12:00
Jóladagur Lokað Lokað Lokað Lokað
Annar í jólum Lokað Lokað Lokað Lokað
Gamlársdagur Lokað 10:00 – 13:00 10:00 – 13:00 10:00 – 12:00
Nýársdagur Lokað Lokað Lokað Lokað

Þjónustuver Símans 8007000

Aðfangadagur 12:00 – 16:00
Jóladagur 14:00 – 20:00
Annar í jólum 14:00 – 20:00
Gamlársdagur 12:00 – 16:00
Nýársdagur 14:00 – 20:00

Allt

Ilmurinn úr eldhúsinu – Ragnar Freyr

19/12/2017 • By

Ragnar Freyr Ingvarsson einnig þekktur sem Læknirinn í eldhúsinu gerði hefðbundin jólamat með nútímalegu sniði fyrir þættina Ilmurinn úr eldhúsinu. Sous vide hamborgarhryggur er eitthvað sem margir munu prófa enda fjömörg heimili komin með slíkar græjur í notkun.

Hér má sjá uppskriftir þáttarins.

Svínahamborgarahryggur „sous vide“ – púðursykursteiktar kartöflur og rauðkál
2 SS hamborgarahryggir
200 ml rauðvín
200 ml kjötsoð
2 stjörnuanísar
3 lárviðarlauf
2-3 negulnaglar
15 piparkorn
Setjið svínahamborgarahrygginn í ziploc poka og hellið víni og kjötsoði saman við. Bætið kryddinu saman við og lokið pokanum undir þrýstingi.
Eldið í vatnsbaði í þrjár til fimm klukkustundir við 60-72 gráður. Ragnar Freyr eldaði kjötið á 60° í þættinum, hitastig annars eftir smekk.  Þegar kjötið er tilbúið penslið þið það með gljáa og steikið í ofni þar til gljáinn hefur karmellisserast.
Ég gerði minn gljáa úr malti, rauðvíni og hunangi – sauð það niður í potti og bar á kjötið.
Rauðkál
1/2 rauðkál
2 græn epli
1 rauðlaukur
2-3 dl rauðvínsedik
2 dl balsamedik
5 msk sykur
100 g smjör
2 stjörnuanísar
1 msk kóríanderfræ
salt og pipar
Skerið rauðkálið, eplin og rauðlaukinn og steikið í smjörinu þangað til að það er mjúkt. Hellið þá sykrinum, edikinu, kryddinu saman við og blandið vel. Hitið að suðu og látið allan vökva sjóða niður.
Púðursykurbrúnaðar kartöflur
1 kg kartöflur í nokkuð jafnri stærð – soðnar og kældar
50 g sykur
50 g púðursykur
50 ml vatn
30 g smjör
Leysið sykurinn upp í vatni og hitið á pönnu, sjóðið niður þangað til að sykurinn fer að taka lit, bætið þá smjörinu á pönnuna. Þegar smjörið er bráðið og búið að freyða hellið þá kartöflunum saman við og sjóðið þær upp úr sykurbráðinni. Eldið þangað til að bráðin klístrast utan um kartöflurnar.
Sósan
700 ml kjötsoð frá grunni
smjörbolla
rjómi eftir smekk
rifsberjasulta eftir þörfum
salt og pipar

Fyrst bjó ég til grísasoð eftir kúnstarinnar reglum. Gulrætur, laukur, sellerí og hvítlaukur skorið smátt og steikt í nokkrar mínútur. Síðan brúnaði ég nokkur grísabein í ofni og setti í pottinn. Setti hálfa flösku af rauðvíni út í og sauð upp áfengið. Setti svo 2 lítra af vatni og hitaði að suðu. Saltaði og pipraði og bætti við nokkrum lárviðarlaufum. Soðið upp og svo  niður, þannig að 700 ml urðu eftir.

Bjó til smjörbollu, 50 gr af smjöri, 50 gr af hveiti hrært saman í heitum potti. Bætti síðan síuðu soði saman við og sauð í nokkrar mínútur til að ná hveitibragðinu burtu.

Þá er bara að bragðbæta sósuna þangað til að hún verður ljúffeng. Bætið vökva af kjötinu saman við, skvettu af rjóma, sultu, Lea og Perrins Worchestershire sósu, salti og pipar. Bragðið til þangað til að þið eruð sátt við guð og menn.

Dásamlegur Pipp-ís með heimagerðri súkkulaðisósu

750 ml rjómi
6 egg
150 g sykur
1 vanillustöng
4 súkkulaði stykki – Pralín frá Nóa Síríus

Aðskiljið eggjarauðurnar frá hvítunum. Setjið eggjarauðurnar í skál. Blandið sykrinum saman við og hrærið vandlega saman. Því næst skafið þið innan úr einni vanillustöng og hrærið vandlega saman við eggjablönduna. Þarna er maður kominn með vanilluís – og í raun hægt að stöðva á þessum tímapunkti – eða halda áfram með hvaða annað hráefni sem er.

Setjið til hliðar í augnablik á meðan þið sinnið öðrum hráefnum sem eiga að fara í ísinn.
Næst er að stífþeyta eggjahvíturnar. Það hjálpar að setja smá sykur saman við þær – einhver sagði mér að þær myndu verða betri við það – en ég sel það ekki dýrara en ég keypti !
Svo er það auðvitað rjóminn – en hann er lykilatriði í þessari uppskrift og ástæða þess að fólk biður um ábót. Takið hann beint úr kælinum og þeytið saman. Gætið þess að breyta honum ekki í smjör.
Skerið súkkulaðið í bita.

Svo er lítið annað en að blanda ísnum saman. Hrærið fyrst rjómann saman við eggjarauðurnar, svo eggjahvíturnar. Svo súkkulaðinu. Blandið þessu vandlega saman með sleikju – varlega – þar sem þið viljið ekki slá loftið úr ísnum.

Svo var ísnum skellt í ísskálina (sem þarf að geyma í frosti í 15 tíma áður en hún er tekin í notkun). Ísinn er svo hrærður í 15-20 mínútur þangað til að hann hefur blandast vel saman. Geymdur í frysti þangað til að hann er tilbúinn.
Sósan er svo einfölt að það er eiginlega kjánalegt. Bræðið súkkulaði í potti í skvettu af rjóma. Hitið og hrærið.
Hellið yfir ísinn. Njótið.
Nú mega jólin fara að koma.
Verði ykkur að góðu!

Allt

Ilmurinn úr eldhúsinu – Berglind

19/12/2017 • By

Það hafa margir sent okkur fyrirspurnir um uppskriftirnar hennar Berglindar hjá Gulur, Rauður, Grænn og Salt en það má sjá hana framreiða dýrindis rétti í þáttunum Ilmurinn úr eldhúsinu sem búið er að sýna í Sjónvarpi Símans.

Forréttur – Humarvefja í hvítlaukssmjöri

Fransbrauð
Humar, skelflettur
Smjör
Hvítlaukur
Steinselja
Sítrónupipar

Bræðið smjörið, pressið hvítlaukinn og blandið saman ásamt steinseljunni. Skerið skorpuna af brauðinu og fletjið það út með kökukefli báðum megin. Hreinsið humarinn og leggið hann á brauðið. Kryddið með sítrónupiparnum. Vefjið brauðinu utan um humarinn og veltið rúllunum upp úr hvítlauskssmjörinu. Bakið í ofni við 200°C í 10-15 mín. Berið fram með rucola og hvítlaukssósu.

Aðalréttur – Hægelduð önd með eplafyllingu fyrir sex manns.

3 kg önd
3 epli
2 rauðlaukar
1 poki sveskjur

Sósa

2 gulrætur
1 laukur
3 hvítlauksrif
3 sellerístönglar
1 tsk piparkorn
5 lárviðarlauf
innmatur úr öndinni
salt
pipar
ólífuolía
2 dl rauðvín
1 l vatn
rifsberjahlaup
smá sítrónusafi

Snyrtið öndina og þerrið vel að innan sem utan. Saltið og piprið hana ríflega. Pikkið göt á húðina og innan úr til að fitan fari inn í fuglinn frekar en að leka niður.

Skerið laukinn í fjórðunga og eplin í báta. Steikið lauk í nokkrar mínútur og bætið því næst eplum og sveskjum saman. Steikið í um 5 mínútur. Takið af hellunni og kælið lítillega.

Setjið fyllinguna í öndina og lokið fyrir með kjötpinnum. Stingið öndinni inn í 130°c heitan ofn með undir- og yfirhita (ekki blástur) í 6 klst. Takið úr ofni og látið standa í 15 mínútur áður en þið skerið kjötið niður. Setjið fyllinguna í skál og berið fram með öndinni.

Skerið grænmetið fyrir sósuna niður í bita. Setjið grænmetið í ofnplötu/steikarfat ásamt innmatnum. Saltið og piprið. Hellið rauðvíni yfir allt og dreypið síðan ólífuolíu yfir. Setjið inn á sama tíma og þið byrjið að elda öndina. Hellið vatninu saman við eftir nokkrar klukkustundir.

Þegar öndin er tilbúin, hellið þá sósunni yfir í pott og sigtið í leiðinni. Látið sósuna sjóða í um 30 mínútur eða þar til hún er farin að þykkna. Fjarlægið reglulega fituna sem myndast. Smakkið að lokum til með salti, pipar og bragðbætið með smá sítrónu, rifsberjahlaupi eða sojasósu. Einnig er gott að bæta smá skvettu af rjóma saman við – en það er ekki nauðsyn.

Sætkartöflumús með púðursykurs- og pekanhnetukurli

3-4 sætar kartöflur
100 g sykur
2 egg
1 tsk vanilludropar
70 g smjör
1 dl mjólk
Salt og pipar eftir smekk

Kurlið

100 g pekanhnetur
200 g púðursykur
40 g hveiti
70 g smjör

Afhýðið kartöflurnar, skerið í bita og sjóðið. Stappið því næst kartöflurnar saman við sykur, egg, vanilludropa, smjör og mjólk og saltið og piprið. Setjið í ofnfast mót.

Saxið pekanhneturnar og setjið í pott ásamt púðusykri, hveiti og smjöri. Bræðið saman og hellið síðan yfir kartöflumúsina. Bakið í 170°C heitum ofni í 30 mínútur.

Eftirréttur

Risalamande ostakaka – fyrir 6-8

Karamellubotn

150 gr sykur
50 gr möndur
100 gr haframjöl
50 g möndlumjöl

Fylling

250 g rjómaostur
250 ml sýrður rjómi
250 ml rjómi
3 msk flórsykur
1 vanillustöng
2 msk síróp

Toppur

kirsuberjasósa
hvítt súkkulaði

Stráið sykur á pönnu og bræðið þar til hann er orðinn gylltur á lit.

Saxið möndlur gróflega á meðan. Þegar sykurinn er tilbúinn takið þá af pönnunni og bætið söxuðum möndlum, haframjöli og möndlumjöli út í.

Blandið vel saman á pönnunni. Hellið á bökunarpappír og dreifið vel úr blöndunni. Kælið. Brjótið niður og setjið í eftirréttaglösin.

Gerið því næst fyllinguna. Hrærið rjómaost og sýrðan rjóma saman. Bætið fræjum úr vanillustöng saman við ásamt flórsykri og sírópi og hrærið saman. Hrærið rjóma í annarri skál. Blandið síðan varlega samman við með sleif. Deilið fyllingunni á glösin yfir karamellubotninn.

Hellið að lokum kirsuberjasósu yfir fyllinguna og skreytið með rifnu hvítu

súkkulaði. Geymið í kæli þar til eftirrétturinn er borinn fram.


Allt

Jólagjöfin í ár

15/12/2017 • By

Jólaverslunin hefur farið vel af stað hjá okkur, þetta verða sannkölluð SIM korta jól. Margir sem ætla að hafa harða pakka undir jólatrénu, gefa eitthvað snjallt eða hjálpartæki fyrir tónelskendur.

Okkur datt því í hug að taka saman hvað hefur verið vinsælast fyrir þessi jól, í engri sérstakri röð.

1) iPhone X. Snjallsíminn enduruppgötvaður segja Apple, kannski eitthvað til í því enda magnað tæki. Með iPhone X fyrir jólin fylgir þráðlaus hleðslumotta að verðmæti 6.490 kr og 150 GB af gagnamagni.

2) AppleTV 4K. Nýjasta útgáfan af AppleTV nú með 4K og HDR stuðningi. Frábært fyrir Netflix, YouTube og allar hinar streymisþjónusturnar.

3) iPhone 8 og iPhone 8 Plus. Snarpari og stílhreinni en nokkru sinni fyrr og nú með þráðlausri hleðslu. Með iPhone 8 og 8 Plus fyrir jólin fylgir þráðlaus hleðslumotta að verðmæti 6.490 kr og 150 GB af gagnamagni.

4)  Samsung Galaxy S8 og Samsung Galaxy S8 Plus. Mögulega fallegustu snjallsímar sem komið hafa út en með þeim fyrir jólin fylgja Samsung IconX þráðlaus heyrnartól að verðmæti 34.990kr og 150GB af gagnamagni.

5) Apple AirPods. Lauflétt þráðlaus heyrnartól, nauðsynleg nú þegar að heyrnartólatengið er að hverfa úr símum.

6) Kareoke hljóðnemi. Tengdu hljóðnemann við símann yfir bluetooth og einn,tveir,þrír þú átt sviðið!

7) Soundboks. Ferðahátalari sem kemst upp í ellefu, sprengir skalann og breytir garðveislu í útihátíð.

8) Spjaldtölvur, og þá helst Samsung Tab S3 og iPad. Eðlilega enda frábær tæki.

9) Tinitell krakkasími. Snjallari og einfaldari síma er ekki hægt að finna, frábær fyrsti sími.

10) Fitbit Alta mælir allt, alla hreyfingu sem og svefn.

11) Bose QC35, heyrnartól með frábærri „noise canceling” virkni sem eyðir út umhverfishljóðum. Flugferðir og langar bílferðir hafa aldrei verið betri.

 


Allt

Ilmurinn úr eldhúsinu – Jói Fel

28/11/2017 • By

Í kvöld, er annar þáttur af Ilmurinn úr eldhúsinu á dagskrá í opinni dagskrá auðvitað í Sjónvarpi Símans.

Jói Fel eldar dásamlega rétti og sýnir okkur hvernig á að matreiða girnilegar villibráðar bruschettur, hreindýrafille með girnilegu meðlæti.

Og uppskriftirnar? Þær eru hér.

Villibráðar bruchettur

Ristað brauð, eitthvað gott brauð

Smjör

Hunang

Balsamikedik

Truffluolía

Villibráð t.d. gæs, önd eða hreindýr

Garðablóðberg

Látið garðablóðberg utan um kjötið, brúnið smjör mjög mikið á pönnu og eldið kjötið þar til það er vel brúnað. Takið af hitanum og kælið við stofuhita. Skerið í mjög þunnar sneiðar.

Ostar að eigin vali

Rifsberjasulta

Fallegt, blandað salat

Jarðarber, bláber eða önnur ber eftir smekk

 

Hreindýrafile

Hreindýrakjöt

Pekanhnetur

Sykur

Létt brúnið pekanhnetur á pönnu og setjið 2-3 msk sykur saman við og veltið hnetunum vel uppúr karmellunni. Setjið á álpappír og kælið.

Kjötið stendur úti við stofuhita með garðablóðbergi.

Athugið að þrífa ekki pönnuna eftir hneturnar.

Kjötið er svo steikt upp úr smjöri, hitið smjörið mjög vel og brúnið kjötið mjög vel á háum hita.

Setjið í eldfast mót og inní c.a 90°-120°C heitan ofn og eldið uppí u.þ.b. 54°. Látið kjötið standa í um 5 mín. hið minnsta áður en það er skorið niður.

 

Bökunarkartöflur 

Skerið kartöflur niður í litla teninga og steikið á pönnu þar til þeir eru vel brúnir. Svo er hægt að hita þá létt upp í restina rétt áður en bera á fram.

 

Villisveppasósa

Athugið að nota helst sömu pönnu áfram sem er ekkert búið að þrífa á milli.

100gr smjör

500gr blandaðir sveppir

30gr þurrkaðir villisveppir, maukaðir mjög smátt

1 dl portvín

3 dl villibráðasoð

1/2 l rjómi

Gráðostur

Rifsberjahlaup

Salt og pipar

Steikið sveppi upp úr smjöri og brúnið vel ásamt villisveppum, setjið þá vínið saman við og sjóðið niður. Blandið villibráðasoðinu saman við og látið suðuna koma upp. Setjið þá rjóma saman við ásamt gráðosti og sultu. Látið suðuna koma upp og slökkvið svo undir, kryddið með salti og pipar.

Gott er að láta sósuna standa í smá tíma og hita svo upp aftur áður er borin er fram.

 

Bleikur marengs

4 hvítur

250g sykur

1 tsk edik

Vanilludropar

Salt

Rauður matarlitur

Allt þeytt saman í stífan marengs. Setja nokkrar góðar matskeiðar á plötu. 

Ber að eigin vali

Vanilluís

Flórsykur

Myntulauf

Afgangurinn af ristuðu hnetunum

 

Bakið við 100°C í 45 mín. Slökkvið þá á ofninum og látið standa í 30 mín. Kælið vel.

 

Veljið þau ber sem ykkur líkar best við, u.þ.b. 500g.

Berin eru skorin niður og steikt á pönnu. Kreistið sítrónusafa yfir og setjið smá hunang saman við. Maukið berin lítillega og berið svo fram við stofuhita.

Setjið marengsinn á disk og væna matskeið af vanilluís yfir.

Flórsykur dassaður yfir til skrauts.

Myntu lauf notuð sem skraut.

Stráið svo afganginum af ristuðu hnetunum yfir.

Verði ykkur að góðu!


Allt

Ilmurinn úr eldhúsinu – Hrefna Sætran

22/11/2017 • By

Jólahátíðin snýst að miklu leiti um mat. Við gerum okkur glaðan dag með okkar nánustu og reiðum fram kræsingar, oft byggðar á gömlum fjölskylduhefðum en prófum líka nýtt inni á milli.

Ilmurinn úr eldhúsinu eru nýir þættir í Sjónvarpi Símans Premium þar sem ólíkir aðilar elda fyrir okkur sinn uppáhalds jólamat. Hér eru uppskriftir úr þættinum hennar Hrefnu Sætran.

Kalkúnninn

3 stk kalkúnabringur

125 g gróft salt

85 g púðursykur

1,5 lítrar vatn

1 msk svört piparkorn

1 tsk einiber

3 cm rifin engiferrót

4 stk lárviðarlauf

2 stk kanilstangir

1,5 lítrar ískalt vatn (klakavatn)
3 stk appelsínur (börkur og kjöt)

Setjið allt hráefnið í pott og hitið þar til saltið og sykurinn er uppleystur. Leyfið vökvanum að kólna og bætið svo ískalda vatninu út í. Leggið kalkúnabringurnar í vökvann og geymið þær yfir nótt í pæklinum inni í ísskáp. Það er líka hægt að leggja þær í pækilinn snemma dagsins sem þið ætlið að elda þær en ég mæli frekar með hinu. Takið svo bringurnar upp úr vökvanum og þerrið þær létt. Eldið þær inní ofni í sirka 30 mínútur á 175° eða þar til kjarnhitinn hefur náð 72°c. Svo er gott að leyfa þeim að standa í svona 10 mínútur áður en þið skerið þær.

Fylling

2 box sveppir (blandaðir)
4 stk shallott
4 hvítlauksrif
2 stilkar sellerí
50 g gráðaostur
8 sneiðar beikon
Valhnetur
Kjúklingasoð
Brauð
Rjómi

Skerið sveppina, laukana og selleríið niður í bita. Skerið líka beikonið niður. Brúnið beikonið í potti upp úr smá olíu. Bætið grænmetinu út í og steikið við miðlungs hita. Bætið svo soðinu út í og sjóðið niður um helming. Bætið svo rjómanum út í, rífið brauð út í, kryddið með gráðaosti, salti og pipar.

Reyktar laxalettur

Bechamelsósa m engifer

2 msk smjör

2 msk hveiti

500 ml mjólk

3 cm engiferrót

2 msk hunang

Salt og pipar

Bræddu smjörið í potti og pískaðu hveitinu saman við. Hrærðu í dálitla stund til að elda hveitið. Helltu svo mjólkinni hægt og rólega saman við og hrærðu í allan tímann til að sósan hlaupi ekki í kekki. Kryddaðu svo til með engiferrótinni, hunanginu og salti og pipar.

10 stk tartalettuform
1 flak reyktur lax
200 g grænar ertur
4 stk stórar kartöflur

Skerðu kartöflurnar með parísarjárni í kúlur eða bara í teninga. Sjóddu svo kartöflurnar í 10 mínútur upp úr saltvatni. Settu kartöflurnar í ísvatn til að þær ofeldist ekki. Skerðu laxinn í bita. Raðaðu svo tartalettuformunum á ofnskúffu. Raðaðu svo laxinum, grænu ertunum og kartöflunum til skiptis ofan í formin og settu sósu yfir og á milli. Bakaðu svo tartaletturnar við 180°c í 10 mínútur.

Gott er að hafa laxinn og allt hráefnið kalt þegar það fer í tartaletturnar til að laxinn ofeldist ekki því hann er betri svona létt eldaður en samt heitur.

Sörur

3 stk eggjahvítur
3 dl flórsykur
4 dl rice krispís

Þeytið eggjahvíturnar þar til þær eru stífar. Bætið flórsykrinum smátt og smátt saman við. Blandið rice krispísinu svo saman við með sleikju í lokin. Setjið með tsk á smjörpappír (gott að smyrja hann aukalega með smjöri svo auðveldara sé að ná kökunum af) og bakið við 180 gráður í 8 mínútur.

6 stk eggjarauður
300 g mjúkt smjör
1 dl sýróp
2 msk kakóduft
1 msk sterkt kaffi

Þeytið rauðurnar í hrærivél. Hellið sýrópinu í mjórri bunu út í hægt og rólega. Þeytið þar til rauðurnar eru dáltið stífar. Skerið smjörið í litla kubba og bætið rólega útí en þeytið áfram á fullu. Bætið svo kakóinu og kaffinu út í í lokin og þeytið alveg í 10 mínútur áfram þar til kremið er létt. Smyrjið kreminu á kalda botnana, kælið Sörurnar og dýfið svo toppnum upp úr bræddu rjómasúkkulaði.

Tvö góð ráð við bakstur.

Takið út smjörstykkið kvöldið áður og geymið það úti á borði yfir nótt svo það sé allt jafn lint þegar þið bakið. Gott er að strjúka innan úr hrærivélarskálinni með smá ediki til að hún verði alveg fitulaus og hrein. Þannig þeytast eggjahvíturnar betur og verða umfangsmeiri.


Allt

Þekkirðu Pabbana í Sjónvarpi Símans Premium?

09/11/2017 • By

Í Sjónvarpi Símans Premium eru yfir 7.000 klukkustundir af allskonar sjónvarpsþáttum og kvikmyndum. Þar er að finna ýmsa feður sem eru jafn misjafnir og þeir eru margir. Hér eru nokkrir eftirminnilegir, en hversu vel þekkir þú þá?

Taktu prófið. Þú gætir unnið Weber iGrill grillmæli til að gefa heppnum föður á feðradaginn. Allir sem fá fullt hús stiga detta í pottinn, þú mátt reyna eins oft og þú vilt. Prófið spyr í lokin um nafn og netfang. Það er gert svo hægt sé að hafa samband við vinningshafann.


Sjónvarp

Tommi í Nýrri sýn í Sjónvarpi Símans

07/11/2017 • By

Tómas Andrés Tómasson verður í þættinum Nýrri sýn í Sjónvarpi Símans í kvöld kl. 20.20. Tommi er betur þekktur sem Tommi í Tommaborgurum og nú Tommi á Búllunni eftir langa sögu innan veitingabransans.

Samkvæmt upplýsingum frá Skoti framleiðslufyrirtækinu sem gerir þættina ólst
Tommi upp hjá ömmu sinni og afa eftir að móðir hans flutti til Bandaríkjanna þegar hann var barn. Föður sinn þekkti hann aldrei en hann var Bandaríkjamaður sem hvarf að landi brott þegar móðir Tomma var ólétt. Tommi byrjaði ungur að drekka en eftir að hann lagði Bakkus á hilluna hafi lífið breyst sem og hugsunin, hegðunin og lífssýnin.

Tommi hefur átt og rekið ófáa veitingastaðina og segir í þættinum í kvöld að róðurinn hafi oft verið þungur en með eljusemi, ósérhlífni og góðu fólki hafi Tommi ávallt lent á fótunum. Hann á og rekur Búlluna ásamt syni sínum. Staðirnir eru orðnir 20 talsins, bæði hérlendis og erlendis.

Önnur þáttaröð Nýrrar sýnar undir stjórn Hugrúnar Halldórsdóttur hefur vakið mikla athygli – rétt eins og sú fyrri. Þættirnir í þessari seríu verða fimm þar sem þekktir landsmenn segja frá því hvernig þeir tókust á við erfiða lífreynslu. Þá má nálgast í Sjónvarpi Símans Premium þegar hentar og þeir eru sýndir í opinni dagskrá í Sjónvarpi Símans á þriðjudagskvöldum kl. 20.20.

Eins og áður sagði framleiðir Skot Productions þættina fyrir Símann.


Allt

Ragnheiður Sara í Nýrri sýn í kvöld

31/10/2017 • By

„Ef þú átt einhvern draum, gerðu þá allt sem þú getur til þess að láta hann rætast,“ segir Ragnheiður Sara Sigmundsdóttir, ein af hraustustu konum heims í þættinum Nýrri sýn í Sjónvarpi Símans.

Önnur þáttaröð Nýrrar sýnar undir stjórn Hugrúnar Halldórsdóttur hefur vakið mikla athygli – rétt eins og sú fyrri. Þetta er þriðji þáttur af fimm í þessari seríu þar sem þekktir landsmenn segja frá því hvernig þeir tókust á við erfiða lífreynslu.

Í fyrstu tveimur þáttunum deildu Salka Sól og Davíð Þór Jónsson sögu sinni. Þættina má nálgast í Sjónvarpi Símans Premium þegar hentar og þeir eru sýndir í opinni dagskrá í Sjónvarpi Símans á þriðjudagskvöldum kl. 20.20. Hægt er að fá Sjónvarp Símans Premium innan Heimilispakkans.

Skot Productions framleiðir þættina fyrir Símann.