Allt

Einlægt fólk með alvöru sögur í Biggest Loser

21/09/2017 • By

„Það eru allar mögulegar tilfinningar [innra með mér]. Gleði, spenna, hræðsla, kvíði – allt saman,“ segir Ólafía Kristín Norðfjörð, ein tólf keppenda í Biggest Loser Ísland, í fyrsta þættinum sem sýndur verður í kvöld í opinni dagskrá í Sjónvarpi Símans kl. 20. Sú sem þetta skrifar var svo heppin að fá að sjá fyrsta þáttinn enn í vinnslu. Hann er flottur. Kemur á óvart og þá fyrst og fremst fyrir hve persónulegur hann er. Við fáum að kynnast keppendunum tólf, sem segja af einlægni frá um leið og þau keppast þau um að missa sem mesta þyngd í þessari fjórðu þáttaröð af Biggest Loser Ísland. Sex karlar og sex konur á aldrinum 19-43 ár. Þáttaröðin er sú fyrsta sem tekin er upp á Bifröst.

„Ég hef oft reynt að létta mig og oft tekist ágætlega,“ segir Almar Þór Þorgeirsson í þessum fyrsta þætti. „Svo er maður búinn að vera að reyna núna síðastliðið ár að að koma sér í gott form, en hefur bara gengið illa. Mig vantar gott spark í rassgatið og hef trú á því að Gurrý og Evert séu góð í að sparka.“

Keppendurnir eru Almar Þór Þorgeirsson, Arna Vilhjálmsdóttir, Dagbjört Ben Guðfinnsdóttir, Dagný Ósk Bjarnadóttir, Daria Richardsdóttir, Eygló Jóhannesdóttir, Guðjón Bjarki Ólafsson, Helgi Már Björnsson, Hjörtur Aron Þrastarson, Ólafía Kristín Norðfjörð, Ragnar Anthony Svanbergsson og Svanur Áki Ben Pálsson.

„Mig langar að breyta um lífsstíl, því að ég verð ekki langlífur svona. Ég finn að líkaminn er að gefa mér aðvaranir,“ segir þátttakandinn Ragnar Anthony Svanbergsson. „Það er núna eða aldrei. Annars enda ég hjálparvana þegar ég er orðinn þrítugur.“

Í fyrsta þættinum kynnumst við keppendum og bakgrunni þeirra. Sjáum fyrstu æfingarnar og hvort þau lenda í höndum Gurrýjar eða Everts og kveðjum fyrsta þátttakandann. Áhugasamir geta fylgst með Biggest Loser Ísland og kynnst keppendunum enn betur á Mbl.is. Ef þú missir af þættinum á Sjónvarpi Símans er hann að sjálfsögðu í Sjónvarpi Símans Premium.