Þriðju kynslóðar farsímakerfi Símans er komið í gagnið.
Starfsmenn fengu forsmekk á sæluna frá og með deginum í dag, en þjónustan mun standa viðskiptavinum Símans til boða á allra næstu dögum. Kerfið býður upp á margfaldan gagnaflutningshraða á við það sem hingað til hefur þekkst, sem opnar á algerlega nýja þjónustumöguleika.
Upplifunin á því að vafra um Vefinn í farsímanum er allt önnur og miklu betri; boðið er upp á farsímasjónvarp og hægt að hringja myndsímtöl.
Stóra byltingin felst samt ekki síst í því að nú er hægt að tengja fartölvur þráðlaust við Netið hvar og hvenær sem er með svokölluðum gagnakortum. Þannig þarf t.d. ekki að vera í vafa um að komast á Netið á mikilvægum fundi úti í bæ, auðvelt fyrir verktaka að tengjast á byggingarsvæðinu eða sendibílstjórann í bílnum sínum og jafnvel hægt að taka fartölvuna með á völlinn svona til að fylgjast með stöðunni í hinum leikjunum.
Fræðilega býður kerfið sem Síminn hefur sett var upp allt að 7,2 Mbit/s hraða, en sá hraði deilist reyndar niður á alla þá sem eru í sama sendireit, auk þess sem umhverfisþættir, s.s. fjarlægð frá sendi, byggingar, gróður, hólar og hæðir geta haft áhrif. Þannig er raunhæft að segja að hver notandi geti fengið um 2 Mbit/s hraða – ekki ósvipað algengum heimatengingum fyrir 2-3 árum síðan. Í framtíðinni verður svo hægt að auka afkastagetu kerfisins enn frekar.
Svæðið sem þjónustan nær til í fyrstu er höfuðborgarsvæðið allt og Flugstöð Leifs Eiríkssonar í Keflavík. Frekari uppbygging stendur fyrir dyrum á öðrum helstu þéttbýlisstöðum, en þau plön verða nánar kynnt síðar.
Starfsmenn Símans hafa unnið þrekvirki í sumar. Sem dæmi hafa verið settir upp um 100 3G sendar og þá er ótalin vinna sem liggur í kerfisbúnaði, þróun lausna, samningum við birgja og efnisframleiðendur og svo mætti lengi telja. Það verður gaman að sjá viðtökurnar eftir helgi, þegar þessi fyrsta “bylgja” af 3G lausnum kemur á almennan markað, en svo er að sjálfsögðu meira í pípunum.
Ég læt þessu lokið með mynd sem tekin var í dag af Sjónvarpinu í Símanum keyrandi á Sony Ericsson W880i símanum mínum og tengt við hátalara – eða “heimabíókerfi fyrir álfa” eins og einn samstarfsmaður minn komst svo skemmtilega að orði 
Uppfært 17. ág, 2007: Breytti upplýsingum um tímasetningu. 3G mun standa almennum viðskiptavinum til boða á allra næstu dögum. Nánar um það síðar.
Til hamingju Símastarfsmenn, ég skal samgleðjast ykkur þegar ég fæ að vera með
Hæ
Ég hef verið að fylgjast með þróun 3G á Íslandi, end a áhugamaður um fjarskipti og annað slíkt tækjaflóð. Ég hef ekki séð útbreiðslukort hjá ykkur ennþá varðandi 3G (né upplýsingar á http://www.gsmworld.com/roaming/gsminfo/, undir Iceland) , einnig sem að 3G vefsíðan á síminn.is hefur ekki verið uppfærð ennþá. Og síðan hefur þetta ekkert verið auglýst svo að ég taki eftir því, en þeir sem eru með 3G síma nú þegar ættu að vera farnir að geta notað þá í Reykjvík og nágrenni á 3G kerfinu.
Eins og fram kemur í færslunni, þá er 3G ekki komið á almennan markað enn.
Þegar það gerist verða þessar upplýsingar án efa uppfærðar.
Ég efast um að það fari fram hjá þér þegar markaðssetningin hefst
Til hamingju með 3G. Er kominn með kortið og þar með merkið í símann. (Sá reyndar merkið í símanum á gamla kortinu í UK í vor – hvers vegna þurfti að skipta?)
Finn hins vegar engar upplýsingar um hvað þarf að gera til að nota 3G í stað GPRS. Sé ekki betur en að GPRS tengist þegar ég opna Óperuna…
Annað hvort eru dagsetning og tími röng eða netþjónninn er staddur 7 klst. austan GMT?